şiir. öykü, makale, deneme, tiyatro, masal, fıkra, anı, sohbet, röportaj yazılarının yayınlandığı uluslara arası yazar ve şairlerin katılım gösterdiği edebiyat sayfasıdır. Uyum platformudur.
Söyləməlisən
[ Hörmətli şair İmran Güllübulaqlının
“Deyim, deməyim” şeirinə ]
Hər kəsin sevdiyi bir gözəl olur,
Aşiqlər daima sərgərdan olur,
Dünya sevənlərlə boşalıb, dolur,
Sevgini o qıza söyləməlisən!
Deyəsən, o qızı pünhan sevirsən,
Ondan aralıda, uzaq gəzirsən,
Bəlkə o da sevər, hardan bilirsən,
Sevgini o qıza söyləməlisən!
Halını anlayıb, duyan çox olar,
Dərdinə şərikəm deyən çox olar,
Kənarda lağ edib, gülən çox olar,
Sevgini o qıza söyləməlisən!
Hüsnü gözəllərin etibarı az,
Hərənin əlində bir sədəfli saz,
Etmə guley-güzar, öz sevgindən yaz,
Sevgini o qıza söyləməlisən!
Göstər sevdiyinə sədaqətini,
Ürəkdə gizlənən məhəbbətini,
Kitaba salmışam təmiz eşqini,
Sevgini o qıza söyləməlisən!
Müəllif: Elmaya Cabbarova.
19.07.2022.
www.kafiye.net
. Deyim,deməyim?
Bir gözəl eşqinə alışdım,yandım,
Onu dərdlərimin məlhəmi sandım.
Gecə də,gündüzdə o qızı andım,
Sevgimi canana deyim,deməyim?
Ürəyim eşqini ələdi,süzdü,
Əllərim yoluna gül-çiçək düzdü.
Bir cavab vermədi,o məni üzdü,
Dərdimi qanana deyim,deməyim?
Eşqimi dərk edib,anlayanım çox,
Qınayıb,arabir danlayanım çox.
Bu eşqi saf bir eşq sanmayanım çox
Sözümü sanana deyim,deməyim?
Dərdmənlər dərdini mənimlə bölür,
Bir gözüm ağlayır,bir gözüm gülür.
Neçə gözəllər var dərdimdən ölür,
Oduma yanana deyim,deməyim?
Qoy cəmi şairlər qayğıma qalsın,
Sevgimi həvəslə qələmə alsın,
Bu təmiz eşqimi kitaba salsın,
Mən şair İmrana deyim,deməyim?
İmran Güllübulaqlı
19.07.2021.
www.kafiye.net
Yorum Yapın