şiir. öykü, makale, deneme, tiyatro, masal, fıkra, anı, sohbet, röportaj yazılarının yayınlandığı uluslara arası yazar ve şairlerin katılım gösterdiği edebiyat sayfasıdır. Uyum platformudur.
YAZIĞIN GƏLMƏSƏ DƏ
Yadımdadı,hər şey yadımdadı –
Gözlərimin gözlərinə yalvarışı da,
Gözlərinin gözlərmə şimal baxışı da…
Başımı,gözümü,üzümü,gecəmi- gündüzümü
döyəcləyən qəzəb yağışı da…
Yadımdadı göylərin o günə qarğışı da…
Ulduzların gözlərimdə sayrınışı,
Vaxtın,zamanın,anın dayanışı da,
Bəxtin,talenin,qismətin mənimlə
qovdu-qaç yarışı,
Basılıb,özümdən asılıb,
özümün-özümə qəbir olub,
özümün-özümdə quylanışı da ;
Dünyanın ilan olub qıvrıla-qıvrıla,burula-burula,
Yorula-yorula üstümdə yatması da ;
Dizlərimin qatlanması,dodaqlarımın çatlaması ;
Gülüşlərindən qulaqlarımın partlaması ;
Ciyərlərimin alışması,ürəyimin yanması da ;
Ayaqlarının cansız,hissiz,duyğusuz,
Səssiz-nəfəssiz cismimin üstündən
adlaması da yadımdadı!
Arxanca baxa-baxa qaldım…
Gözlərimin birini sol,birini sağ ovcuma saldım.
Almadığın,qoxlamadığın,yaxana sancmadığın,
Saçlarına taxmadığın,gününə ağlamadığın
güllərdən tez saraldım.
Güllər mənə ağladı,mən güllərə ağladım.
Dağlar-daşlar mənə ağladı…
Çöllər-çəmənlər,heyvanlar-quşlar mənə ağladı…
Çaylar,göllər,dənizlər mənə ağladı…
Yollar,izlər,gecələr-gündüzlər mənə ağladı.
Ağladı!
Elə ağladı ki onları ovutmağa,
onları dilə tutmağa,onları uyutmağa
gücüm çatmadı.
Onlar məni atmadı,onlar məni unutmadı.
Amma yazıq,yazıq onlara!
Min il sonra da ağlayacaqlar…
Min il sonra da uyumayacaqlar…
Doymayacaqlar…
Soyumayacaqlar…
Ağlayacaqlar…
Elə ağlayacaqlar,elə ağlayacaqlar ki,
Zamamın gedişini,dünyanın gərdişini,
Acını,şirini,istini-soyuğu da duymayacaqlar.
Gəlsənə,gülüm,gəlsənə!
Gəlsənə,qurtaraq onları həsrətdən,
Qurtaraq onları intizardan,göz yaşlarından!
Gəlsənə!
Gəlsənə,qurtaraq onları başlarına yağan
daş yağışlarından,
göylərə
yalvarışlarından…
Nə deyim?
Nə edim ki,məndən çox
onların halına yanasan?
İnadını atasan…
Qayıdasan…
Hardasan?..Hardasan?..Hardasan?
Gülüm,hardasan?..
Məzahir İsgəndər
16.05.2021
www.kafiye.net
Yorum Yapın