Söz mülkündədi

Yazılan əsərlər, deyilən sözlər,
Ən gözəl məkanda, söz mülkündədi,
Sevinən ürəklər, süzülən gözlər,
Ruhlar məbədində, söz mülkündədi.

Bahalı daş – qaşdır dünyanın malı,
Nazəndə qızların koftası, şalı,
Mirvari sözlərdən toxunan xalı,
Divardan asılıb, söz mülkündədi.




Var söz xəzinəmiz, ali bir nemət,
Qədrini bilənlər, qazanır şöhrət,
Axtardığın dəyər, umduğun qiymət,
Xiridar evində, söz mülkündədi.

Yoxsa küdurətin, safsa niyyətin,
Əyəcək boynunu kor cəhalətin,
Elə bu dünyada haqq – ədalətin,
Mizan tərəzisi, söz mülkündədi.

Nə qədər yazan var, dürr söyləyən var,
Ləli, cəvahiri, söz ustadı var,
Böyüyə, kiçiyə diqqət, qayğı var,
Hörmət də, izzət də söz mülkündədi.



Müəllif: Elmaya Cabarova.

30.03.2022.
www.kafiye.net