şiir. öykü, makale, deneme, tiyatro, masal, fıkra, anı, sohbet, röportaj yazılarının yayınlandığı uluslara arası yazar ve şairlerin katılım gösterdiği edebiyat sayfasıdır. Uyum platformudur.
Bu gecə.
Dedin gələcəyəm ey gül yuxuna,
Gələcəm işvəylə,nazla bu gecə!
Dedin yox edəcəm dumanın,çənin,
Gələcəm şerimlə,sazla bu gecə!
**********
Dedin oxşayacam siyah telini,
Öpüb isidəcəm o ağ əlini,
Əlimlə verəcəm dəstə gülünü,
Gələcəm röyana yazla bu gecə!
**************
Dedin bürüyəcəm çiçək ətrinə,
Odlara düşəcəm sənin xətrinə,
Şerinə,sözünə,bircə sətrinə,
Nəgmələr qoşacam gözlə bu gecə!
*************
Dedin mələk olub girdin qəlbimə,
Yaşamaq həvəsi verdin qəlbimə,
Arzunu-istəyi hördün qəlbimə,
Açacam qəlbimi sözlə bu gecə
************
Aşacam dağlardan,keçəcəm düzdən,
Öpüb al yanaqdan,o qara gözdən,
Tutacam yükümü şeirdən,sözdən,
Gələcəm röyana izlə bu gecə!
***********
Ay da bədirlənib batmış olarsa,
Gözlərin həsrətdən yaşla dolarsa,
Həsrət küləkləri telin yolarsa,
Sal qolun boynuma gizlə bu gecə!
*****************
Dedin unutdurub qəmi-nisgili,
Dərib gətirəcəm bağçadan gülü,
Olacam Solmazın şeyda bülbülü,
Gələcəm dağlardan,düzlə bu gecə!!!
05-12-2016
Solmaz Şirvanlı
www.kafiye.net
Yorum Yapın