AY MƏNİM MİLLƏTİM, HARA GEDİRİK
Bu baxış nə? Bu təlim nə? Məşq nə?
Bu qəzəb nə? Bu həsəd nə? Eşq nə?
Bir dayanın,durun Allah eşqinə,
Ay mənim millətim,hara gedirik?

Bu nə titrət? Bu nə xilqət? Nə hiddət?
Bu nə arzu? Bu nə istək? Nə niyyət?
Daxildə rəzalət, üzdə fəzilət,
Ay mənim millətim,hara gedirik?

Bu nə məktəb? Bu nə kitab? Bu nə dərs?
Bu nə kərdi? Bu nə mora? Bu nə mərs?
Sən məndən,mən səndən olub bətər,nəs,
Ay mənim millətim,hara gedirik?

Bu nə zəncir? Bu nə çarmıx?Bu nə dar?
Bu nə nalə? Bu nə fəryad? Bu nə zar?
Hər üzdə,baxışda,gözdə intizar,
Ay mənim millətim,hara gedirik?

Bu nə inam? Bu nə iman? Bu nə din?
Bu nə fərman? Bu nə zaman? Bu nə gün?
Olub da gümandan,amandan sürgün,
Ay mənim millətim,hara gedirik?

Bu nə haldı? Nə hallanış? Nə isim?
Bu nə qarğış? Bu nə cadu? Nə tilsim?
Olub tara,olub saza sarı sim,
Ay mənim millətim,hara gedirik?

Bu nə qeyrət? Nə qətiyyət? Bu nə and?
Bu nə damaq? Bu nə dodaq? Bu nə dad?
Ayrılıb,ayrışıb, olub anda yad,
Ay mənim millətim,hara gedirik?

Bu nə zəfər? Nə səyahət? Bu nə kəşf?
Bu nə ilğım? Nə aldanış? Bu nə səhv?
Şeytandan, iblisdən diləyib də əfv,
Ay mənim millətim,hara gedirik?

Bu nə ocaq? Bu nə alov? Bu nə od?
Bu nə axış? Nə yır-yığış? Bu nə mod?
Min yanıb,inləyib, olub odlu ud,
Ay mənim millətim,hara gedirik?

Bu nə çovğun? Bu nə boran? Bu nə yel?
Bu nə tufan? Nə fırtına? Bu nə sel?
İtirib bir Vətən,itirib bir el,
Ay mənim millətim,hara gedirik?

MƏZAHİR İSGƏNDƏR

www.kafiye.net