şiir. öykü, makale, deneme, tiyatro, masal, fıkra, anı, sohbet, röportaj yazılarının yayınlandığı uluslara arası yazar ve şairlerin katılım gösterdiği edebiyat sayfasıdır. Uyum platformudur.
Təvəkkül Goruslu Kategoriler
QALIB
Könülü ağladır qubarı sözün,
Çoxalıb, köhnəlib nübarı sözün,
Dilimi yandırır qabarı sözün,
Sənə deyiləsi çox sözüm qalıb!
BU DÜNYANIN
Daş olanı özündədi, gətirməz,
Faş olanı üzündədi, ötürməz,
Xoş olanı sözündədi, götürməz,
Bu dünyanın imanı kaş, yönü kaş!
SƏNDƏN AYRILALI..
Səndən ayrılalı günüm batıbdı,
Sənli dəqiqələr günə dönəydi!
Önümdə talenin yolu yatıbdı,
Uzanan bu yollar sənə dönəydi!
NƏ VAXTDI
Nə vaxtdı ruhumu odlayır atəş,
İçimdə alışıb Xocalı yanır!
Könülü cızhacız yalayır atəş,
Alovu göylərə ucalıb yanır!
ÇİÇƏYİM
Sinəmdə gül açan, bitən çiçəyim,
Səni incitməsin nə şübhə, güman.
Şəbingül ətirli gülüm, göyçəyim,
Köksümdə ləçəyin solmaz heç zaman!
ÜRƏYİM
Bir ovuc köz olub misraya düşən,
Sözlərlə qorlanan, yanan ürəyim!
Şaxtayla, ayazla alovsuz bişən,
Misrada üşüyən, donan ürəyim!
XAMDI KI
Qəlbimin tavanı nə vaxtdı açıq,
Damdıqca könlümə nisgil damdı ki!
Yurdum ayaq altda, vətən yarımçıq,
Nəyim bütövdü ki, nəyim tamdı ki!
SEVDA DUMANI
Sənin dərdlərini sağaltmaz həkim,
İzn ver, əzizim nazını çəkim!
Gül üzün, nəzərdən, gözdən qoruyan
Könlündə eşq adlı bir saray tikim.
ŞUŞADA UCALDAQ BİR ZƏFƏR TAĞI
O qədər bəhs etdik dağdan, zirvədən,
Kiçicik daşlara zirvə söylədik!
O qədər bəhs etdik sünnət, kirvədən,
Alçaq erməniyə kirvə söylədik!
TORPAĞIM
Səndən danışırlar, səndən deyirlər,
İllərdi işğalda qalan torpağım!
Qanını içirlər, canın yeyirlər,
Şəhidlik toxumu salan torpağım!
