Чүкөдөй өлчөп



Чүкөдөй өлчөп тагдырым чийген,

Чечилбес бекем түйүнгө түйгөн.

Жараткан жашоо-өмүр бак берип,

Саамайдан сылап, чекемден сүйгөн.




Ыйлаган жерде ыйлатып эзген,

Кубанган жерде кубантып келген.

Топташтай чачып акылым, оюм,

Сыноонун түрүн ченебей берген.




Жараткан уста, чебер да экен,

Чыбыктап улам болсун деп бекем.

Алышып тагдыр оюну менен,

Максаттар ишке ашпаган нечен.




Өксүгүн өмүр толтуруу үчүн,

Билемин басаар сапарым узак.

Калемим менен жол чийип өтөм,

Алдыма койсо ким бирөө тузак.




Жашалбай калган жашоомду улап,

Толуктап барам кемтигин кынап.

Жаманын чийип, жакшысын илип,

Келечек күнгө жаксам деп чырак.





Кундузбү Маматова

Куку

02.06.2022

www.kafiye.net