Hərdən, qəlb çəkdiyin gətirmir dilə,
Sözümü söyləyir, yaş gilə-gilə.
“Salam-Saq ol” üçün gəlmişdin elə?
Dərdimi bölməmiş, hara gedirsən?

Ünvanısan sual-sorğularımın,
Sənsən vahiməsi qorxularımın,
Sənə hiss etdiyim duyğularımın,
Əcəli gəlməmiş, hara gedirsən?

Yoluna dikilib qalmış gözümün,
Gücünə güc versin, bəlkə dözümün.
Sənə deyiləsi min bir sözümün,
Heç birin bilməmiş, hara gedirsən?

Tənha günlərimi sovurub-sovub,
Məlhəm əllərinlə, başımı ovub,
Qəmimi, ahımı dağlara qovub,
Güldürüb-gülməmiş, hara gedirsən?

Qıyma ki, həsrətdən sənsiz dona can.
Gözlərə gözlərim fəda, cana can.
Bəs deyirdin, mənimləsən sonacan?
Rəhimli ölməmiş, hara gedirsən?

Müəllif:Aygün Rəhimli
www.kafiye.net