Axtardığım ləl yox, bəxt kitabıdır,
Əlimdə talehin düyün sapıdır.
Döydüyün, çırpıb getdiyin qapıdır,
Hansı üzlə qayıtmısan geriyə?

Milyon dil tökəsən, əmin deyiləm,
Yalandan ağlama, qəmin deyiləm.
Sən həminkisən, mən həmin deyiləm,
Hansı üzlə qayıtmısan geriyə?

Rəhimlini zalım kimi süzürsən,
Nədən narazısan, dodaq büzürsən?
Öldürüb getdiyin qəlbi gəzirsən?
Hansı üzlə qayıtmısan geriyə?

Müəllif: Aygün Rəhimli
www.kafiye.net