Gücümüz çox şeyi həll etməyə bəs eyləməyir,
Satmayaq heç olmasa, şeytana vicdanımızı.

Heç güzəşt eyləməyib, verməmişiksə bir aman,
Dinlərmi axirətdə, kim isə amanımızı?!

Mərhumun varisinə toy kimi süfrə bəzədək,
Ginnesin kitabına saldıraq ehsanımızı.

Bığ qoyaq alt dodağa, qulaqlarlı sırğalayaq,
Qısaldaq, ol ki yetər, şalvarı, tumanımızı.

Ananas, kivi, banan mentalitetçün yaddır,
Heç biri etməz əvəz, milli badımcanımızı…

İlanın zəhrinə qarşı tapacaq çarə təbib,
Bölünər yeddi yerə, dadsa ilan, qanımızı.

Yetişib bölgələrin, indi özəl mollaları,
Hərəsi bir tərəfə yönəldir gümanımızı.

Vallah, bu inkişafa mən görürəm, göz dəyəcək,
Arabir, heç olmasa, xub qaşıyaq yanımızı.

Çingizin sözlərinə, çoxları pis gözlə baxır,
Deyirlər ki, kənar ol, qaynadaq qazanımızı.

Çingiz Kürdəmirli.
www.kfiye.net