Ağayana

By - Huseyindurmus Mart 27, 2018 Comments (0) 2 Mins Read

Ağayana
(təcnis)

/Bir dəyərli dostum, həm də oxucum şeirimə verdiyi rəydə
mənim“Ağa Nəzərəm, belə gəzərəm” tərzdə yazdığımı
vurğulamışdı. Bu təcnisi də ona görə zarafatyana yazdım.
Dostumun sayəsində məncə gözəl bir şeir alındı/.

Ömür yolum tamam qüssə, kədərdi,
Bircə günüm olmayıb ağ, ay ana,
Alın yazısını pozmaq hədərdi,
Qaçammazsan “qədər”dən ağa, yana.

Gözüm yoxdu nə gövhərdə, nə zərdə,
Şair kimi olmamışam nəzərdə,
Məni görsə, qaçar Ağa Nəzər də,
Qorxar ki, ahımdan ay ağa, yana.

Gözdən kədər, sevinc yaşı axır da…
Əvvəl olan kimi, vardır axır da,
Elə etmə, yaxınların axırda,
Üz qoyduğun yerə, nə ağa yana*.

Arxa da var mənə, bilin, kölgə də,
İstəmirəm şair olam “kölgə”də,
Çingizəm, çoxunu qoydum kölgədə,
Dilimdən hər çıxan söz ağayana.!
—————————————————–
*Mənası belədir : Qazdıqları qəbirə və
kəfənə heyifləri gəlməsin.