Шуақ боп шашылар ем

Көзіме көзің түссе ылаң салып,

Селт етті сезім шіркін тағы налып.

Астан-кестен тулаған жүрегімді,

Ұстасам бекен әлде кісен тағып.

Жүзіңізді көргенше жүз өзгеріп,

Сарғайған жапырақты көзім көріп.

Бақытыңа мойын бұрып қарамадың,

Төзбеді сұлу жүзім жасты төгіп.

Кездескен сен жаңбырлы көктемім ең,

Нөсерлеткен дауылсыз өткенім ең.

Медет тұтар,сен менің тірегімсің,

Күтем сені өмірдің өткелінен.

Бағың болсам мәңгілік өзіңізге,

Иланып сенер едім сөзіңізге.

Ғашық оты жалындап лауласа егер,

Шуақ боп шашылар ем төріңізге.

Милена Алиханова

www.kafiye.net