Vətən fədaisi,elin qızıyam,
Səmada parlayan Dan ulduzuyam,
Haramdan uzağam,halal ruzuyam,
Vətənə qurbanlıq,şəhid canam mən!

Xocalı dərdiylə qəlbi göynəyən,
Şəhidlər,əsirlər qəddini əyən,
Al-yaşıl əvəzi qaralar geyən,
Ağlar el qızıyam,bir insanam mən!

Kaş azad eyləyəm əsir torpağı,
Qalmaya əllərdə çaýı-irmağı,
Qaytaram geriyə kaş Qarabağı,
Suşasız qalandan sis-dumanam mən!

Qarabağ deməkdən qabardır dilim,
Ərşə bülənd olub naləm-nisgilim,
Ayaqlar altında Xarı bülbülüm,
İnləyən bir neyəm,həm kamanam mən!

Solmazam,Vətənin çınqıllı daşı,
Qarabağ dərdidir gözümün yaşı,
Qalxın düşmən ilə edək savaşı,
Vətən bayrağında qızıl qanam mən!

Solmaz Şirvanlı
08-10-2019
www.kafiye.net