şiir. öykü, makale, deneme, tiyatro, masal, fıkra, anı, sohbet, röportaj yazılarının yayınlandığı uluslara arası yazar ve şairlerin katılım gösterdiği edebiyat sayfasıdır. Uyum platformudur.
Ömür
kitabım
Ey ruh əkizim, ömür kitabım,
Vardır hər vərəqdə gözəl anlarım,
Xəyali də olsa, *Sonsuz roman*ım,
Ay hər il yenidən gələn baharım!
O qədər uzaqsan, həsrət bitməyir,
Harayım çatmayır, ünüm yetməyir,
Nədən taleyimiz üzə gülməyir,
Bəxtimin ulduzu, sevgili yarım!
Gözlərimə məftun olan sevgili,
Gəl baxışlarına qərq eylə məni,
Yoxluğunda qəlbə dolan nisgili,
Varlığınla yox et, son intizarım!
Sevgiyə dünyada qal, həvəsini,
Sevənə qaytaraq ruh, nəfəsini,
Ölməyən sevdanın xəritəsini,
İlk dəfə biz çəkək, əhdim – ilqarım!
Ruhun nəğməsini, qəlbin səsini,
Sevən könüllərin iradəsini,
İlahi sevginin abidəsini,
İkimiz yaradaq, könül memarım!
Yerini dəyişək Günəşin, Ayın,
Səmtini çevirək axar gur çayın,
Hər ağacdan verək meşəyə payın,
Biz qoşa dayanaq, dağ tək vüqarım!
Bir süfrə bəzəyək güllü – çiçəkli,
Cəh – cəhli quşlarla, ağ kəpənəkli,
Sən rəssam xülyalı, sevən ürəkli,
Mən “Şur,” “Bəstənigar” ey vəfadarım!
Elmaya Cabbarova.
27.06.2022.
www.kafiye.net
Yorum Yapın