AT MƏNİ..



Mələk kimi çıxmış idin qarşıma

Niyə yersiz oyun açdın başıma?

Qıymayaydın gərək cavan yaşıma,

Çalış artıq unut məni,at məni,

Demədim ki,nadanlara sat məni..


*

Əl uzatdın,verdim sənə əlimi,

Dərdlər qoymur susum,tutum dilimi,

Verdin mənə dünya qədər zülümü,

Bu oyunda etdin axır mat məni,

Demədim ki,nadanlara sat məni..


*

Hər əzaba sinə gərdim,dayandım,

Oda saldın ta alışdım,ta yandım,

Çox şükür ki,son məqamda oyandım,

Kül eylədi bu dəhşətli od məni,

Demədim ki,nadanlara sat məni..


*

Haqqı-sayım gözlərindən gələcək,

Sən bilməzsən,bunu Xaliq biləcək,

Mənə deyil,sənə aləm güləcək,

Zənn eləmə çöldə bitən ot məni,

Demədim ki,nadanlara sat məni..


*

Xəyanətin səni saldı gözümdən,

Bəhanəylə tez-tez küsdün sözümdən,

Uzaq dolan,daha əl çək izimdən,

Çünki,heç vaxt etməmisən şad məni,

Demədim ki,nadanlara sat məni..



Nazlı Hacılı.

www.kafiye.net