şiir. öykü, makale, deneme, tiyatro, masal, fıkra, anı, sohbet, röportaj yazılarının yayınlandığı uluslara arası yazar ve şairlerin katılım gösterdiği edebiyat sayfasıdır. Uyum platformudur.
Qoy xeyrə açılsın sabahlarımız!
Bəsləyib qəlbində neçə arzu -kam
Sabaha ümidlə boylanır insan.
Qüssəyə, kədərə verməyib aman
Allahdır arxamız, həm dayağımız,
Qoy xeyrə açılsın sabahlarımız!
Günəş şüasını səpib düzlərə,
Al rəngə boyanıb çəmən, dağ –dərə.
Bu nə gözəllikdir, bu nə mənzərə?!
Şəfəqdən pay alsın od -ocağımız
Qoy xeyrə açılsın sabahlarımız!
Çağlasın dağların gur şəlaləsi,
Dinsin tütək səsi, dinsin ney səsi,
Bir başqa aləmdir şehi, jaləsi
Qəlbə şəfa versin buz bulağımız.
Qoy xeyrə açılsın sabahlarımız!
Vətən torpağının hər çağı gözəl,
Bəhrəli bağçası, hər bağı gözəl,
Meşəsi, talası, hər dağı gözəl,
Gəlsin zirvələrdən xoş sorağımız,
Qoy xeyrə açılsın sabahlarımız!
GÖVHƏR RÜSTƏMOVA.
www.kafiye.net
Yorum Yapın