Şair Ömrü

Bir damcını dəniz edər, 
Bir çınqılı dağ eyləyər şair sözü. 
Bir bülbülə nəğmə olar, 
Xəzanlığı gül-çiçəyə bürüyərək 
Bağ eyləyər şair sözü.

Dirək olar yerlə göyə, 
O, Tanrının nidasıdır. 
Mayasıdır həqiqətin, 
Ədalətin sədasıdır.

O qələmin qılınc edər, 
Qalxan edər əsərlərin. 
O bir zirvə yolçusudur, 
Qanad edər şeirlərin.

Şair könlü bir ulduzlu asimandır, 
Parıldayar, zülmətlərə işıq saçar. 
Şair fikri min hikmətli bir qıfıldır, 
O qıfılı ilhamıyla şair açar.

Şair ömrü xalqın yükün 
Ürəyində daşımaqdır. 
Fərqi yoxdur: Ya diriykən, ya ölüykən
– Şair ömrü baxışlarda, dodaqlarda, 
Ürəklərdə yaşamaqdır.

18 fevral 2015
Qanun Ümman Qahabli
www.kafiye.net