Qayıdıram mən
(Şeirlərimə dodaq büzən bir nadan həmyerlimə)

Mən türk övladıyam, təmizdir qanım,
Bu xalqın yolunda qurbandır canım,
Aramsız işləyir söz dəyirmanım,
Xiridarlar üçün üyüdürəm mən.

Hörməti-izzəti sözlə qazannam,
Kiçik işarədən çox şeyi qannam,
Gah atəş oluram, alışıb-yannam,
Gah da buza dönüb soyuduram mən.

Bir başını qaldır, gözlərimə bax,
Qoymaram açılsın üzünə sabah,
Mahir cərrah kimi, kəsməzdən qabaq,
İynəmi batırıb, keyidirəm mən,

Sözdür ibadətim, sazdır azanım,
Qələm əlimdədir, çıxınca canım,
Nəyimə lazımdır düşmən qazanım?..
Dostların sırasın böyüdürəm mən.

Çingizi bir dinlə, yaxşı qulaq as,
Girmə bu meydana, salma basabas,
Cisminə şeirdən biçərəm libas,
Sən gedən yolları qayıdıram mən !!!

Çingiz kürdəmirli
www.kafiye.net